Ramazan ayı müsəlman dünyasında mənəvi saflaşma, səbir və paylaşma dəyərlərinin ön plana çıxdığı xüsusi bir dövrdür. Ramazan boyunca oruc tutan insanlar yalnız qidalanmadan deyil, həm də pis vərdişlərdən uzaq duraraq daxili dünyalarını zənginləşdirməyə çalışırlar.

Bu ay eyni zamanda cəmiyyət daxilində həmrəyliyin gücləndiyi, yardımlaşma və mərhəmətin daha çox hiss olunduğu bir ay kimi dəyərləndirilir.

Cağrı.az Ramazan ayının dəyəri və əhəmiyyəti barədə ilahiyyatçı-alim İbrahimin fikirlərini öyrənib.

- Hörmətli İbrahim bəy bildiyimiz kimi artıq mübarək Ramazan ayının son günlərini yaşayırıq. Bir ay boyunca tutduğumuz oruc, etdiyimiz ibadətlər və keçirdiyimiz mənəvi təcrübələr hər birimizin həyatında müəyyən izlər buraxdı. Bəs görəsən bu müqəddəs ay bizə nə qazandırdı? Oruc və ibadətlər insanın ruhuna, düşüncəsinə və həyatına hansı dəyərləri əlavə etdi? Ramazan ayının bizə bəxş etdiyi mənəvi qazanc və həyat dərsləri haqqında fikirlərinizi bilmək istərdik.

- Ramazan ayı insanın öz nəfsinə nəzarət etməyi öyrəndiyi xüsusi bir mənəvi məktəbdir. Bu ayda insan yalnız yemək və içməkdən çəkinmir, həm də davranışlarına, sözlərinə və düşüncələrinə diqqət etməyə çalışır. Oruc tutmaq insanın səbirli olmasını, ehtiyac içində olan insanların halını daha yaxşı anlamasını və Allaha yaxınlaşmasını təmin edir. Ramazan insanlara xatırladır ki, maddi nemətlərdən daha vacib olan mənəvi dəyərlərdir. Bu ayın ən böyük dərslərindən biri də insanın özünü tərbiyə etməsi, pis vərdişlərdən uzaqlaşması və yaxşı əməllərə yönəlməsidir.

- Bayram müsəlmanlar üçün nə ifadə edir?

Bayram müsəlmanlar üçün yalnız sevinc və şənlik günü deyil, həm də mənəvi zəfərin və ibadətlərin qəbul olunmasına ümidin rəmzidir. Ramazan ayı boyunca edilən ibadətlərin, tutulan orucların və edilən yaxşılıqların sonunda gələn bayram insanlara birlik və paylaşma hissini xatırladır. Bu günlərdə insanlar bir-birini ziyarət edir, küsülülər barışır və ehtiyacı olanlara kömək etməyə çalışırlar. Bayram həm də ailə bağlarını möhkəmləndirən, cəmiyyət daxilində sevgi və mərhəmət hisslərini gücləndirən xüsusi bir gündür. Buna görə də bayram müsəlmanlar üçün həm dini, həm də sosial baxımdan böyük əhəmiyyət daşıyan bir gündür.

Söyünlü Ləman