28 May – Müstəqillik Günümüz mübarək! Başda Cümhuriyyət qurucuları olmaqla, bu vətən uğrunda canından keçən bütün qəhrəmanlarımızı hörmət və şükranlıqla anırıq. Üçrəngli bayrağımız daim zirvələrdə dalğalansın, müstəqilliyimiz əbədi olsun!

Hürriyyət Öndəri

Qaranlıq illərdə yandırıb məşəl,
Millətin qəlbinə ümid gətirdin.
Sayəndə quruldu azad bir vətən,
Əsarət zəncirin qırdın, bitirdin.

Dalğalandı göydə üçrəngli bayraq,
İstiqlal sevdası sardı hər yanı.
Sarsılmaz iradən, böyük zəkanla,
Sən yenidən qurdun Azərbaycanı.

"Bir kərə yüksələn bir daha enməz!"
Bu uca amalla düşdün tarixə.
Böyük bir dövlətin təməlin qoyub,
Köçdün yaddaşlara, keçdin tarixə.

Qürbətdə keçsə də illərin sənin,
Qəlbində yurd eşqi sönmədi heç vaxt.
Tarix şahiddir ki, polad iradən,
İstiqlal yolundan dönmədi heç vaxt.

Bu gün şükranlıqla anıraq səni,
Əbədi heykəltək ucaldır millət.
Əmanət etdiyin ulu vətəni,
Sıxaraq köksünə qoruyur əlbət.

Tarixə yazıldın qızı hərflə
Qəlblərdə taxt qurdun, Məhəmməd Əmin!
Layiqsən sevgiyə, sonsuz tərifə,
Sənsən ilk öndəri uca millətin.

Məhərrəm BƏHRİ