"Ümumdünya Səhiyyə Təşkilatı (ÜST) ABŞ-dan 260 milyon dollardan çox borcu ödəməyə hazır olması barədə heç bir siqnal almayıb".

Çağrı.az xəbər verir ki, təşkilatın məlumatına görə, bu olmadan Vaşinqtonun ÜST-dən tam çıxması mümkün deyil.

ÜST-ün baş direktoru Tedros Adhanom Qebreyesus Cenevrədə keçirilən brifinqdə deyib: “Biz vəsaiti almağa ümid edirik, amma indiyə qədər heç bir siqnal almamışıq”.

Onun sözlərinə görə, ABŞ-ın təşkilatdan çıxmasının həm ABŞ-ın özü, həm də qlobal səhiyyə sistemi üçün risklər yarada biləcəyi fikrini çatdırmaq daha vacibdir. Qebreyesus səhiyyə sahəsində beynəlxalq əməkdaşlığı və həmrəyliyi gücləndirməyə çağırış edib.

Daha əvvəl ABŞ ÜST-dən çıxdığını elan etmişdi, lakin təşkilat qeyd etmişdi ki, bütün borclar ödənilənə qədər üzvlükdən çıxış tam hesab edilə bilməz. ÜST-in məlumatına görə, bu borc 2024-2025-ci illər üçün təxminən 260,6 milyon dollarlıq üzvlük haqlarına aiddir.

Məsələ ilə bağlı yekun qərarların may ayında Cenevrədə keçiriləcək Ümumdünya Səhiyyə Assambleyasının sessiyasında qəbul edilməsi gözlənilir.