Birləşmiş Millətlər Təşkilatının (BMT) Baş katibi Antonio Quterreş Ramazan ayında həmrəylik səylərinin bir hissəsi olaraq Ankaraya səfər edəcək.

Çağrı.az xəbər verir ki, bu barədə Baş katibin sözçüsü Stefan Dujarrik Nyu-Yorkdakı BMT-nin mənzil-qərargahında keçirilən gündəlik mətbuat brifinqində jurnalistlərə məlumat verib.

Məlumata görə, səfər zamanı Quterreş, Türkiyə Prezidenti Rəcəb Tayyib Ərdoğan və xarici işlər naziri Hakan Fidan ilə görüşəcək.

"Bildiyiniz kimi, Baş katib hər il Ramazan ayında həmrəylik səfəri edir. Bu il o, BMT-nin Qaçqınlar üzrə Ali Komissarı və daha sonra Baş katib vəzifələrində çalışdığı müddətdə türk xalqının fövqəladə səxavətini qeyd etmək üçün Türkiyəyə, paytaxt Ankaraya səfər edəcək", - Dujarrik bildirib.

Dujarrik qeyd edib ki, Türkiyə zorakılıq və təqiblərdən qaçmağa məcbur olan milyonlarla insana qapılarını açıb və səfəri zamanı Baş katib Türkiyədəki qaçqınları dəstəkləmək üçün çalışan vətəndaş cəmiyyəti təşkilatlarının nümayəndələri ilə görüşəcək.