ABŞ-ın onlayn ticarət platforması eBay 800 əməkdaşını ixtisar edəcəyini açıqlayıb. 

Çağrı.az xəbər verir ki, bu, şirkətin tam ştatlı işçilərinin təxminən 6%-nə bərabərdir.

Şirkətin yaydığı rəsmi bəyanatda bildirilib ki, strukturun strateji prioritetlərə uyğunlaşdırılması və biznesə yenidən investisiya yatırılması məqsədilə müəyyən vəzifələr ləğv olunur. 

“Təsirlənən əməkdaşların töhfələrinə görə minnətdarıq və onlara diqqət və hörmətlə dəstək göstərməyə sadiqik”, – deyə açıqlamada vurğulanıb.

Qeyd edək ki, qərar eBay-ın bir həftə əvvəl Etsy şirkətindən gənclər arasında populyar olan ikinci əl geyim tətbiqi Depop-u 1,2 milyard dollar nağd ödənişlə satın alacağını açıqlamasından sonra verilib.

Şirkət ötən həftə açıqladığı dördüncü rüb maliyyə hesabatında gəlirlərinin 15% artaraq 3 milyard dollara çatdığını və analitiklərin proqnozlarını üstələdiyini bildirib.

Bu, son üç ildə eBay-da həyata keçirilən üçüncü ixtisar dalğasıdır. Şirkət 2024-cü ilin əvvəlində 1 000 nəfəri (işçi heyətinin təxminən 9%-i), 2023-cü ilin əvvəlində isə təxminən 500 əməkdaşı (təxminən 4%) ixtisar etmişdi.