Müasir şəhərsalma yanaşması təkcə gözəl estetik binaların tikilməsi deyil, həmçinin onların təhlükəsiz istismarının da təmin olunmasıdır.

Çağrı.az xəbər verir ki, bu sözləri jurnalistlərə açıqlamasında Fövqəladə Hallar Nazirliyinin Dövlət Yanğın Nəzarəti Xidmətinin rəis müavini, daxili xidmət polkovniki Cəmil Xudiyev deyib.

O bildirib ki, Fövqəladə Hallar Nazirliyinin təşkilatçılığı ilə Ümumdünya Şəhərsalma Forumunun 13-cü sessiyası (WUF13) ilə əlaqədar "Şəhərsalma fəaliyyətində tikinti, yanğın, texniki və radiasiya təhlükəsizliyinin təmin olunmasında dövlət nəzarəti" mövzusunda "dəyirmi masa" təşkil olunub:

"Tədbirdə müasir şəhərlərin təhlükəsizliyi məsələlərinə toxunulub. Müzakirələr zamanı sürətli urbanizasiya prosesinin getməsinin, iri miqyaslı tikintilərin, o cümlədən hündür mərtəbəli yaşayış binalarının, iri ticarət və logistik mərkəzlərinin, enerji infrastrukturu obyektlərinin sayının artımı, fövqəladə hadisələrin baş vermə ehtimallarının artması xüsusi qeyd olunub. Müasir şəhərsalma yanaşması təkcə gözəl estetik binaların tikilməsi deyil, həmçinin onların təhlükəsiz istismarının da təmin olunmasıdır. Bu kontekstdə dövlət nəzarəti fövqəladə hallara davamlı infrastrukturun qurulmasına xidmət edir. Bu gün keçirilən tədbirdə şəhərsalma forumunda iştirak edən müvafiq icra hakimiyyəti orqanlarının təklifləri dinlənildi, koordinasiyalı fəaliyyətin daha da təkmilləşdirilməsində müvafiq qərarlar qəbul olundu".