İran vasitəçilərə üç mərhələli plan təqdim edib və bu plana əsasən, ABŞ ilə danışıqlar aparmağa hazırdır.

Çağrı.az xəbər verir ki, bu barədə "Al Mayadeen" televiziyası məlumat yayıb.

"İran tərəfi danışıqların birinci mərhələsinin müharibənin bitməsinə, İran və Livana qarşı hərbi əməliyyatların bərpa olunmayacağına dair zəmanətlərin alınmasına yönəlməsini tələb edir. Tehranın şərtlərinə görə, bu mərhələdə başqa heç bir məsələ müzakirə olunmayacaq. Bu məsələ ilə bağlı razılıq əldə olunarsa, ikinci mərhələdə "müharibə bitdikdən sonra "Hörmüz" boğazının idarə olunması məsələsi" Oman tərəfi ilə əlaqələndirilərək müzakirə olunacaq", - məlumatda bildirilib.

İranın təklifinə görə, üçüncü mərhələ Tehranın nüvə dosyesinə aid olacaq.
Kanalın vurğuladığı kimi, İran tərəfi ilk iki mərhələ üzrə razılıq əldə olunana qədər bu məsələni müzakirə etməkdən imtina edir.