“İslam Respublikasına qarşı təcavüz dayandırılarsa və ərazi bütövlüyünə hörmət edilərsə, ABŞ, İsrail və İran arasında sülh əldə edilə bilər”.

Çağrı.az xəbər verir ki, bunu İranın Türkmənistandakı səfiri Əli Müctəba Ruzbehani bildirib.

“Sülhə nail olmaq üçün ən real ssenari təcavüzə son qoymaq və İran İslam Respublikasının ərazi bütövlüyünə, xalqımızın qanuni hüquqlarına hörmət etməkdir. Tarix göstərir ki, İran heç vaxt müharibə axtarmayıb, lakin ləyaqətli diplomatiya vasitəsilə nümayiş etdirdiyi kimi, istənilən təcavüz qarşısında öz dəyərlərini və suverenliyini qətiyyətlə müdafiə edəcək”, - Əli Müctəba deyib.

Səfir qeyd edib ki, İsrail və ABŞ-ın İranın ərazi bütövlüyünə və milli suverenliyinə qarşı yeni təcavüzünün başlanğıcından 40 gün keçib:

“İran xalqı İnqilabın müdrik Ali Lideri, əxlaq və dini təlimlərin müəllimi Həzrət Ayətullah Xameneinin şəhadətinin qırxıncı gününü qeyd edir və həmçinin Minab məktəbinin 168 günahsız şagirdi və onların müəllimləri üçün yas tutur. Bu qırx günlük müqəddəs müdafiə şəhidlərinin qanı danışıqların ön cəbhəsindəki diplomatlarımız üçün böyük bir dəstəkdir”.