Küveyt hava limanına ABŞ-ın "Patriot" hava hücumundan müdafiə raketinin zərbəsi nəticəsində ziyan dəyib.

Çağrı.az xəbər verir ki, hadisədə əsas şübhəli bilinən İslam İnqilabı Keşikçiləri Korpusunun (SEPAH) sözçüsü Hüseyn Mohebi isə hadisəni təkzib edib.

O bildirib ki, İran mülki hədəflərə zərbə endirməyib.

İranın dövlət televiziyası onun sözlərini sitat gətirib: "Küveyt sərnişin terminalına edilən hücumla bağlı insidentin araşdırılması onu göstərir ki, SEPAH-ın Aerokosmik Qüvvələri bu hədəfə heç bir raket atmayıb. Küveyt hava limanı sərnişin terminalının məhv edilməsi Amerika Patriot sistemlərinin səhvinin nəticəsidir və onlar İran raketlərini ələ keçirmək üçün uğursuz cəhddən sonra terminala düşüblər".

Küveytin Mülki Aviasiya Baş İdarəsi daha əvvəl beynəlxalq hava limanının T1 sərnişin terminalına İrandan atılan dronlar və raketlər tərəfindən hücum edildiyini bildirmişdi. Əmirliyin Xarici İşlər Nazirliyinin məlumatına görə, zərbə nəticəsində bir nəfər həlak olub və xeyli maddi ziyana səbəb olub.

Hindistanın Xarici İşlər Nazirliyi daha sonra qurbanın Hindistan vətəndaşı olduğunu açıqlayıb. Küveyt Səhiyyə Nazirliyinin məlumatına görə, sərnişinlər və hava limanı işçiləri də daxil olmaqla ən azı 63 nəfər müxtəlif dərəcəli xəsarətlər alıb.