"Tərəfdaşlarımızdan başqa hərəkətlər, heç olmasa müqavilələrdə nəzərdə tutulan addımlar gözlədiyimiz vaxtlar və hadisələr olub, amma onları görmədik. Hər şey çox nisbidir".

Çağrı.az xəbər verir ki, bunu Ermənistanın xarici işlər naziri Ararat Mirzoyan "Aysor.am" saytına verdiyi müsahibədə Rusiya Təhlükəsizlik Şurasının katibi Sergey Şoyqunun bəyanatına istinadən bildirib.

Nazirin sözlərinə görə, ölkəsi Ermənistan-Rusiya münasibətlərində gərginlik yaratmağa meylli deyil.

Mirzoyan qeyd edib: "Biz Ermənistan-Rusiya münasibətlərində hər hansı bir gərginlik yaratmağa meylli deyilik; əksinə, tərəfdaşlığımızı təbii şəkildə davam etdirməyə meylliyik".

Ararat Mirzoyan Rusiya Baş nazirinin müavini Overçukun Ermənistanın Avrasiya İqtisadi İttifaqlna (Aİİ) üzvlüyü məsələsinin müzakirəsi ilə bağlı açıqlamasına toxunaraq deyib: "Ermənistanın Aİİ-dən çıxması məsələsi Ermənistan belə bir ərizə və istək təqdim etməyincə müzakirə edilə bilməz və biz belə bir istək təqdim etməmişik, buna görə də bizim ittifaqdan çıxmağımız məsələsi müzakirə edilə bilməz".

Ermənistan Respublikasının nə vaxt qərar verəcəyi ilə bağlı suala Mirzoyan belə cavab verib: "Məsələni müzakirə etmək lazım gələndə. Mən hər hansı bir son tarix deyə bilmərəm, belə bir məsələ bu gün bizim gündəmimizdə deyil".

Ermənistan qərar verənə qədər Ermənistanın Aİİ-dəki üzvlüyünün dondurulmasının mümkün olub-olmadığı sualına Mirzoyan belə cavab verib: "Bu, mümkün deyil. Bu, Ermənistan Respublikasının konsensus səsləri ilə müəyyən edilmiş və idarə olunan bir təşkilatdır, bu necə ola bilər?!"

Xatırladaq ki, dünən Təhlükəsizlik Şurasının xüsusi işçi qrupunun iclasında Rusiya Təhlükəsizlik Şurasının katibi Sergey Şoyqu Ermənistan hökumətinin iş tərzinə toxunaraq, bunun Rusiya ilə müttəfiqlik münasibətlərinin ruhuna uyğun olmadığını qeyd etmişdi.

Bundan əlavə, Rusiya Baş nazirinin müavini Aleksey Overçuk dünən Ermənistanın AİB və Aİ arasında seçim qarşısında olduğunu açıqlayıb.