Hollandiya hakimiyyəti son iki gündə ölkəni bürüyən təbii mənşəli olduğu düşünülən bir sıra yanğınların söndürülməsi üçün Avropa İttifaqından (Aİ) kömək istəyib.

Çağrı.az xəbər verir ki, bu barədə milli yanğınsöndürmə koordinatoru Edvin Kok bildirib.

Kok bildirib: "Sorğu Aİ-nin Təcili Yardım Koordinasiya Mərkəzinə göndərilib".

Onun sözlərinə görə, Hollandiya xüsusi olaraq əlavə avadanlıq və yanğınsöndürmə briqadasının köməyini istəyib.

Kok qeyd edib ki, Hollandiya yanğınsöndürənləri artıq iki gündür ki, həddindən artıq təzyiq altında işləyirlər və yanğını təkbaşına söndürməyə davam edə bilmirlər: "Hansı Aİ ölkələrinin Hollandiyaya kömək göstərə biləcəyi hələ də məlum deyil; rəsmi sorğu təqdim edildikdən sonra Aİ orqanları lazımi resursların təmin edilməsinin mümkünlüyünü qiymətləndirməlidirlər".

Qeyd edək ki, son iki gündə Niderlandda onlarla yanğın baş verib. Təcili yardım xidmətlərinin ilkin məlumatlarına görə, yanğınlar təbii xarakter daşıyır və uzun sürən quraqlıqla əlaqədardır. Xüsusilə, 29 və 30 aprel tarixlərində Gelderland və Şimali Brabant əyalətlərindəki üç hərbi təlim poliqonunda yanğınlar baş verib. Bir halda yanğın təlim məşqi zamanı başlayıb. Sursatın partlaması riski yanğınsöndürmə işlərini çətinləşdirir. Hərbi polis hadisələrin səbəblərini araşdırır.