Putin və Salman Yaxın Şərqi müzakirə ediblər

Rusiya Prezidenti Vladimir Putin və Səudiyyə Ərəbistanının vəliəhd şahzadəsi Məhəmməd bin Salman Əl Səud ABŞ-ın İran İslam Respublikasına qarşı hücumu nəticəsində Yaxın Şərqdə gərginliyin artması məsələsini müzakirə ediblər.

Çağrı.az xəbər verir ki, bu barədə Kremlin mətbuat xidməti məlumat yayıb.

Qeyd edilib ki, hər iki tərəf artıq bir neçə ərəb ölkəsinə təsir edən və fəlakətli nəticələrə səbəb olan münaqişənin gərginləşməsinin real riskləri ilə bağlı ciddi narahatlıqlarını ifadə ediblər. Bu kontekstdə Vladimir Putin son dərəcə təhlükəli vəziyyətin siyasi və diplomatik vasitələrlə həll edilməsinin vacib olduğunu vurğulayıb.

Məhəmməd bin Salman Əl Səud öz növbəsində Rusiyanın İran və Fars körfəzi ölkələri ilə dostluq münasibətləri nəzərə alınmaqla, bu dövrdə müsbət, sabitləşdirici rol oynaya biləcəyi fikrini bildirib.