Qazaxıstan Prezidenti Kasım-Jomart Tokayevin “Altın Orda mirası” ilə bağlı açıqlamaları beynəlxalq mediada və sosial şəbəkələrdə geniş müzakirələrə səbəb olub. 

Çağrı.az xəbər verir ki, Moskva mərkəzli media orqanı "The Moscow Times" başda olmaqla bir sıra platformalarda məsələ “Tokayev Qazaxıstanı Altın Ordanın varisi elan etdi” başlığı ilə təqdim edilib.  

Müzakirələrdə bir sıra istifadəçilər Tokayevin çıxışını Qazaxıstanın tarixi yaddaşını və bozqır dövlətçilik ənənəsini ön plana çıxarmaq cəhdi kimi qiymətləndiriblər. Xüsusilə türk dünyasına yaxın çevrələrdə bu yanaşma milli kimliyin və tarixi özünüdərkin gücləndirilməsi kimi şərh olunub. Altın Ordanın parçalanmasından sonra formalaşan Qazax xanlığının müasir Qazaxıstan dövlətçiliyinin əsas sütunlarından biri olduğu da vurğulanıb.  

Digər tərəfdən, bəzi rusiyalı şərhçilər və sosial media istifadəçiləri Tokayevin bu ritorikasını siyasi mesaj kimi dəyərləndiriblər. Onların fikrincə, Altın Orda tarixinin yenidən gündəmə gətirilməsi postsovet məkanında tarix və kimlik üzərindən yeni ideoloji müzakirələr yarada bilər.  

Sosial şəbəkələrdə isə istifadəçilər iki əsas mövqedən çıxış ediblər: bir qrup bunu Qazaxıstanın öz tarixi köklərinə dönüşü kimi müdafiə edib, digər qrup isə orta əsr imperiyalarının müasir siyasi kimliklə əlaqələndirilməsini tənqid edib. Mövzu xüsusilə türk dünyası və Avrasiya geopolitikası ilə maraqlanan auditoriyada geniş rezonans doğurub.