"ABŞ prezidenti Donald Tramp İranla 47 illik sonsuz müharibəni başa çatdırmaq niyyətindədir”.

Çağrı.az xəbər verir ki, bu barədə ABŞ-ın BMT-dəki daimi nümayəndəsi Mayk Valts “Fox News”a bildirib.

“Cimmi Karterdən (1977-ci ildən 1981-ci ilə qədər hakimiyyətdə olan 39-cu ABŞ prezidenti) başlayan 47 illik sonsuz müharibə ilə qarşılaşdıq. Prezident Tramp buna son qoymaq üçün cəsarətli addımlar atır”, - o qeyd edib.

Valts əlavə edib ki, 1979-cu ildə Pəhləvi sülaləsi devrildikdən və İslam İnqilabı nəticəsində Ayətullah Xomeyninin hakimiyyətə gəlməsindən sonra Vaşinqtonun Tehranla ittifaqı qarşıdurmaya çevrildi. Bu, 4 noyabr 1979-cu ildə Tehranda Amerika diplomatlarının əsir götürülməsi ilə nəticələndi. Onlar 1981-ci ilin yanvarında azad edildilər. Bu, diplomatik münasibətlərin kəsilməsinə və İrana qarşı ilk ABŞ sanksiyalarının tətbiqinə səbəb oldu.