Türkiyə Prezidenti Rəcəb Tayyib Ərdoğan İstanbuldakı İsrail Baş Konsulluğuna edilən hücumu pisləyərək, bunu alçaq bir təxribat adlandırıb.

Çağrı.az xəbər verir ki, bu barədə Ərdoğan Ankarada yeni Roketsan müdafiə korporasiyası zavodunun açılış mərasimində bildirib.

"Bu gün İstanbulda törədilən və qəhrəman təhlükəsizlik qüvvələrimizin uğurlu hərəkətləri sayəsində qarşısı alınan qorxaqcasına hücumu qınayırıq. Üç terrorçu zərərsizləşdirilib - biri öldürülüb, ikisi yaralanıb. Qəhrəman polis zabitlərimizdən ikisi yüngül yaralanıb. Terrorizmin bütün formalarına qarşı mübarizəni qətiyyətlə davam etdirəcəyik. Bu günkü kimi qorxaqcasına və planlaşdırılmış təxribatlarla Türkiyənin təhlükəsizliyinə zərər vurulmasına imkan verməyəcəyik", - Ərdoğan qeyd edib.

Türkiyə lideri əlavə edib ki, İstanbul Baş Prokurorluğu və kəşfiyyat xidmətləri bu hücumla bağlı təcili araşdırmaya başlayıblar.